Jeshi la polisi kitengo cha usalama barabarani limesema litafanya ukaguzi kabambe wiki ya usalama barabarani inayotarajiwa kuanza hivi karibuni ambapo magari yatachunguzwa na kuwekewa stika ili kuondoa yaliyo mabovu barabarani.Kaimu kamanda kikosi cha usalama barabarani Tanzania, Kamishna Msaidizi wa Polisi Fortunatus Musilimu Hayo yamesemwa na Kaimu Kamanda Kikosi cha Usalama Barabarani Tanzania, Kamishna Msaidizi wa Polisi Fortunatus Musilimu wakati akitoa elimu kwa umma kuhusu usama barabarani, katika kipindi cha SupaMix cha East Africa Radio. “Magari yote yatapimwa na hakuna mtu yeyote ambaye yupo juu ya sheria katika usalama barabarani tutahakikisha vyombo vyote vinapimwa ili ambavyo ni vibovu vikapate matengenezo” Amesema Kamishna Msaidizi Fortunatus. Kwa upnde wake Mkurugenzi wa Kitengo cha Elimu kwa Umma Kikosi cha Usalama Barabarani nchini, Mrakibu Msaidizi wa Polisi (ASP), Mossi Ndozero amewataka wananchi kujitokeza kwenye maeneo ambayo yatatangazwa na jeshi la polisi katika mikoa na wilaya kwa ajili ya kupata elimu kuhusu usalama barabarani.